Page 68 - Gesamt 2019

Teilen

In St. Johann gibb's den Weihnachtsmorkt im Advent,
mit Glühwein, Guddeln und Standln wia's jeda kennt,
Kinda hucken um's offene Foier, die Musi spüht,
is oi Jahr wieder nett, mia g'foid des Büd!

Vor'm Wischtlstand'l stehn'd a poor Leid,
wei's do die guaden St.Johanna geit,
a öttas Paarl kimmb no vor mia dru,
und b'stöht sie oa Portion, wenn i des richtig vastonden hu.

Vom Adventzauber bi in Geberlaune kemma:
"I spendia enk no a Paarl, megg's enk gean no oas nemma!"
"Na, des passt scho, mia teilen zwischen ins oi Sochen,
owa Donk schee, dass sie ins des Angebot mochen!"

"Meggs vielleicht an Glühwein dazu, es zwoa?
Der tat bei der Kötten sicha nid schoden wia i moa!"
"Gean, sehr nett vo dir - owa nua oan,
is g'scheider mir teilen den a, wia i hod moan!"

Er futtert sei Wischdl, sie schaut zua,
i ku gornid zuaschaun, es losst ma koa Rua,
send sicha nid schmattig, hommb a kloane Renten,
denk ma, dass sie wos g'scheits zun Essen brauchen kennten!

Ich prowias no amoi, geh no amoi zu de zwoa hi,
vielleicht geht's decht, wenn ich a wenk hartnäckig bi,
"Waa's nid gscheider, wennst mein Angebot u'nimmst?
Mia kimmb vie, dass du nid zu dein Teil vom Wischdl kimmst!"

"Donkschee no amoi, owa mia send a eing'spühd's Team,
es is oiwei so, dass i noch'n Datti drukimm!
Mia miassen teilen, wenn ma anouscht hi gehn'd,
wei i boat zum Wischdlessen auf'n Datti seine Zähnd!"

68