am Wüdseeloder
Des Johr ist bei mir nid so guad gonga!
I mecht owa jetz nid zun Jamman u’fonga,
i hu ma im Februar beim Schifohn weh tu,
bi froh, dass wieder hoibwegs hatschen ku.
Bi ReHa gwen, de hommb mi massiascht
und mit a wenk iabn hu i s’Geh prowiascht,
hu mi a hoib’s Johr long ondla plogen miassen,
Radlfohn, im Wossa iabn – adiam s’Geh biassen!
Hu oiwei a Züh k’hobb! Woit auf die Berg auffigeh,
woor wirklich fleissig, woit wieda ohm steh
und oichi schaugn auf insa schee’s Lond,
ebbas Guad‘s jausna, mid da Frau midnond!
Weisenblosen am Wüdseeloder woor mei Züh!
Da Hax ziacht, bein Hatschen hu koa guad‘s Gfüh,
bei dem Wedda, des muas owa oafoch geh!
D’Frau woor a wenk skeptisch, wia i bei da Seilbohn steh.
Donn geht’s dahi, laaft eh nicht schlecht,
auf oamoi bi i oben, bein See wo i sei mecht!
Ma! Ist des schee, i ku auf’s Wossa schaugn,
do häd boid a poor Zachei in die Augn!
Die Musig spüh’d, des Schiffi auf’n See,
da Himmi blau, die Goass, mei is des schee!
A Jausn auf da Hitten, ebbas z’Essen, zun Trinken,
die Haxen im Wossa, im Traam vasinken!
Jo, es woor wieda a Blick ins Paradies!
Des geht bei ins no, is schee, dass so is,
a Privileg, dass bei ins soichane Platzln geit,
a bissei aufpassen drauf, des waa hoid gscheit!
Er do ob’n hod’s jo scho a poormoi prowiascht,
bi eam oiwei wieder auskemma, is scho g’stiascht!
A des Moi woor‘s knopp, es is eam wieda nid gelunga,
der Sauhund do oben, der hod no long nid gwunga!
Zusammenfassung
502 Gedicht Monat November 2023
am Wüdseeloder
von einem Bergerlebnis, das ganz besonders war - mit einem optimistischen Blick in die Zukunft
Type: Gefühl
Beschreibungen und Ausdrücke
Das Jahr ist bei mir nicht so gut gelaufen!
Ich möchte aber jetzt nicht zum Jammern anfangen,
ich habe mir im Februar beim Schifahren weh getan,
bin froh, dass ich wieder halbwegs gehen kann.
Bin auf RehHa gewesen, die haben mich massiert
und mit ein wenig üben habe ich das Gehen probiert,
habe mich ein halbes Jahr ordentlich plagen müssen,
Radfahren, im Wasser übern - manchmal beim Gehen büßen!
Habe immer ein Ziel gehabt! Wollte auf die Berge hinaufgehen,
war wirklich fleißig, wollte wieder oben stehen
und hinunter schauen auf unser schönes Land,
etwas Gutes jausnen, mit der Frau zusammen!
Weisen blasen am Wildseeloder war mein Ziel!
Der Fuß zieht, beim Gehen habe ich kein gutes Gefühl,
bei diesem Wetter, das muss einfach gehen!
Die Frau war ein wenig skeptisch, wie ich bei der Seilbahn stehe.
Dann geht es dahin, läuft gar nicht so schlecht,
auf einmal bin ich oben, beim See wo ich sein will!
Ma! Ist das schön, ich kann auf das Wasser schauen,
da hätte ich bald ein paar Tränen in den Augen!
Die Musik spielt, das Schifflein auf dem See,
der Himmel blau, die Geißen, das ist schön!
Eine Jause auf der Hütte, etwas zum Essen, zum Trinken,
die Füße im Wasser, im Traum versinken!
Ja, es war wieder ein Blick ins Paradie!
Das geht bei uns noch, ist so schön, dass es so ist,
ein Privileg, dass es bei uns solche Plätze gibt,
ein wenig aufpassen darauf, das wäre halt gescheit!
Er da oben hat es ja schon ein paar Mal probiert,
bin ihm immer wieder ausgekommen, es ist schon erstaunlich!
Auch diese Mal war es knapp, es ist ihm wieder nicht gelungen,
der Sauhund da oben, der hat noch lange nicht gewonnen!