Fuchzg Johr Ehe is scho a gonze Bois,
d’Goidene hommbs – die Maria und ihr Lois!
Dass doscht und da zwickt und zwackt, do kust nix mochn,
de Zwoa hommb’s d’Mehrawei lustig und dann’d vü lochn.

Sie gschoffen guat – es weascht wenk gstrieden,
des Rezept is, a diam amoi stad sei – nocha weascht vü vermieden!
Er kennt sie – sie kennt eam – so homms es gschafft,
dass noch so longa Zeit no oiwei recht guat lafft.

Er hot die Scheidl klobn, hot d’Spa weckgspoitn,
nemman Kaffeemochn hommbs si si gut unterhoitn,
da Honig und des Schmoiz steht auf’n Tisch,
des soiwabochne Brot is no gonz frisch.

Sie schmiert eams Brot – so is der Brauch –
donn zögert’s kuschz – und denkt si schlauch:
Heit koit i ma des Woache – die Ringg kriag er,
Fuchzg Johr wor’s onascht – heit mog i nimma mehr!

Oiwei is zruggstonten – so is dazogn!
Dass s’Woache nia nit hobm woit – des wa jetz glogn!
Owa er soid oiwei s’Bessere hobm – owa heit net nit!
Fie des Aufmandln riskierat’s a amoi a Gstrit!

Da Lois sigg d’Ringg, er muas a wenk lochn:
“Siggst – so kust ma a richtige Freid heit mochn!
Die gonzen Johr häd i die Ringg scho woin
am Liabstn woit i mas von Dein Teller hoin!”

So oafach wa’s – wennst wos moggst, muast’s sogn
und nit die gonze Zeit mit dir ummatrogn!
Glei sog’n – zoag wost mext, wias geht!
Boidst die long ummaploggst is des saubled!