An Franzei homms gleand – er soid sie wean
und wei a a Bua is, gibbs Nix zun Rean!
Scho an Kindagoschtn hommbs nit gean mit eam gspüht,
er hot oi hergfotzt – er wor oafach wüd.

A da Voiksschui hommbs sie di Onan a zommtu –
des wor nocha, wiar i’n mit da bluadigen Nosen gsechen hu.
Zearscht mit die Stecken, nocha mit die Eisenstonga –
sie hommb si zu Banden zommtu – und an richtigen Kriag ugfonga.

Springastiefi, Schlogring, Gaspistoin,
bis zun Umfoin saufen – die Baseboischläger aussahoin,
a da Schui nit zschlauch – den Kopf rasiern,
Tätowierunga, Lederwesten – die sinnlose Gwoit kust gspiern!

Boidst Nachrichtn liest, geht’s gonz gleich zua –
Es geht gonz kloan u – wia bei insan Kindagoschtnbua!
Zun Schuigeh homms koan Goid – an Essen feits,
koa Haus zum Wohna, koa Gwond – nur Waffen geits!

A da Zeitung liest, Stoi und Eisen kriagst gonz schwar,
wei’s in China und Indien Hochheisa baun, is rar.
Mia kimmb owa fi, mit d’Waffen mochn’s vü mehr Göd,
siest gawat’s nit so vü vo dem Graffi auf da Wöd.

Die Norrn a da UNO kust vergessen!
Von Frieden schwodern’s – und tand guat essen,
dawei’s hint umma d’Waffn baun
und tonnenweis di Minen in die Erd’n haun.

Ziachz ein de Waffn und schmoiz z’es ei!
Baut’s Hochheisa draus, vü Schuin wand fei!
Zun Kriagfian kriang’s nur no Haselnuss-Staudn,
mit de kinnand si sie den gonzen Tog haun.

Mia hädn leicht Platz auf insra Wöd –
die Gier is a Luada – es geht oiwei nur ums Göd!
Die Weiberleit und die Kinda miassn’s biassn,
dawei sie die Mandaleit an Schädl einschlogn miassn.