Page 15 - Hoangascht_2011

Zölibat Grüß Gott mein Bruder im Herrn! Ich hoffe es wird bald besser wer’n! Mei Sorg is groß, das ma in Schwierigkeiten sand, wei so fü Leit aus da Kirchen austred'n tand! Die traurigen Fälle vo de ma lesen, wo Kinda send die Opfer g'wesen, des Vatrauen is vaschwund‘n, woaß nit, wia ma des wieder zruckkriag'n kunnt’n! Es gibt vüh z'wenk Pfarrer, vüh send scho oid, de weand in Ruhestand geh – und des scho boid! I woas nit, wia mia des in Zukunft mochen, schaugg nit guad eicha – es is nit zun Lochen! Die Beicht im Internet – Multitschoise wia bein Führerschein, u'kreizln ob in „Gedanken“, „Worten“ oder „Werken“ – des wa nit fein! Stod da Absolution an Gutschein für Automaten, wo ma nocha bein Ospeisen die Hostien aussataten. Die Mess auf da Videowand und an Chor vo da CD - na – des mecht ma nit dalebn – des wa nit schee! Owa wos toa, damit des nit passiascht, das sowas nit geit? Mia zwoa wissat’n scho wo‘s feit: Der Zölibat muas weck, nocha wean ma a nit zwieda und junge Leit möten sie donn ois Pfarrer wieda! Gonz wichtig – d’Weiwaleit brauch ma voun am Altor da kammad a gonz neiche Qualität ins Spüh – gonz klor! Vielleicht gwon sie's an Vatikan boids Goid knopp weascht - boid’s nocha no nix tan, fircht i grob, miassn’s mia braven Pfarrer biassen, i hu des Gfüh, das mia do boid amoi was mochen miassen! 13