Page 14 - 2017

Geburtstog

Wia fünfavierzg da Kriag aus wor,
do wor an Herrgott gonz schnoi klor,
de G'schicht, die hod a ordentlich vaschissen!
Er schaugg zu ins ocha und hod a schlechts G'wissen.

Iwalegg hi und her, wos kunnt a toa,
hot sicha nächtelong nid g'schloffen, wiar i hoid moa,
es muas wos sei, wos den Lauf da Wöd nei definiascht,
und zu oana besseren Zukunft fie oi Menschen fiascht!

Mid'n 47ga-Johrgong - damit wor die Lösung g'funten,
damit's auf da Woid herunt wieda hoffen kunnten!
Ois is no nid gelunga, do brauch ma no a wenk Geduid,
da Trump und da BREXIT send owa sicha nid insa Schuid!

Mit siebzig ku ma ohne weiteres an Rückblick wog'n,
wei oas is sicher - und des muas ma oafoch sog'n:
A boid ma oft hikugelt send, mia stehnd oiwa no,
des mocht soibstsicher und stoiz, des is oafoch so!

In da Schuizeit hod ma den Kriag no g'spiat,
hommb owa s'Sporen g'leand, wos dazu fiad,
dass ma donkbor sei kinnand und a nid prossen,
ins owa a nid so leicht iwan Tisch ziachen lossen!

Brauchst neamb nix mehr beweisen, des is jo guad,
nimma so vüh Rücksicht nehma boid ma wos tuat,
mia hommb ja ois Kinda nid s'Laffen g'leand,
damit ma ois Dawoxna decht wieder Oschkriacha weand!

Es hod jeda sein Weg g'mocht, der fleißig wor,
des is heit nimma sicha und nid so klor!
Boid die Kinda heit nix mehr toa derfn oda miassn,
weands des ois Dawoxner moastens biassn!

Den Sex, den gehst sicha a scho gmiatlicha u,
is gonz, gonz fei, wiri a bestätigen ku!
Muas nid sei, dass ma wiaten oda schwitzen,
do is oafocher boid ma ins gmiatlich in die Sauna sitzen!

Die junga Diandl nochschaugn tan ma gean,
i hoff, des weascht nia onascht wean,
is owa so harmlos wia ma des von die Kinda kennand,
wonn z'Weihnochten auf'n Christbam

die Steanspritza brennand.

14