Page 17 - 2017
P. 17
Wochenmorkt
In St.Johann homm's am Freitog an Wochenmorkt eig'fiascht.
Der kimmb guad u, wei sie do wos riascht,
siggst oi Wochen an Haufen Leit durchilaffen,
die a wenk schaugn, ratschen, owa a gonz fleissig kaffen.
Die Lisi tuad gean a wenk Shoppen geh,
ihr Monn da Hansi find des weniger schee,
latscht owa brav mid, tuad Taschen trog'n,
ma kunnt zu eam a Sherpa sog'n!
D'Lisi mecht doscht und do wos Nois prowian
und frog bei die Standla daweis durchspazian,
bein Fischmorkt tuads an Hansi grausen,
bei dem G'ruch kimmb er donn decht eher zun Sausen!
Obst und Gemüse find die Lisi g'sund,
do kafft's gean ei, des is da Grund,
do deaf's a ruhig amoi wos Exotisch's sei,
der Standla kennt si do aus, des ist gonz fei!
"Hansi schau her, dia Kiegei dia rod-grean,
des waar amoi wos nei's, des prowiarat i gonz gean!
I frog amoi wos ma damit tuat,
vielleicht kunnt i an Kosta toa, des gfoiad ma gonz guad!"
Da Standla is deastla und a kompetent,
ma merkt, dass er sei Obst und sei Gemüse kennt:
"Die Litschi is a Frucht, die aus China stommb,
ma ku sie denken, dass dia a weite Reise hinter sich hommb!
Die Frucht is recht beliebt, ma kafft dia gean,
ma muas hoid bedenken, dass dia eing'fiat wean!"
"Siggst es!" sogg da Hansi, "Des kust glei vagessen!
Dia tuat ma einfian und Du hätt'st wieder g'essen!"
17
