Page 21 - 2017

Die Lawine

Danaxt ruaft mi a nett's Weiwaleit u,
ob i nid amoi zur Barbara Karlich kemma ku.
Iwa d'Mundort redn und a poor G'schichtln dazöhn,
hoit oafoch insa scheene Sproch vorstöhn.
I scheiss ma nix, sog oafoch zua,
hoff, dass i do des richtige tua
und vazöh mein Freind an Sepp davu
dass i a Einlodung in die Weanastodt hu.
Der sog amoi gornix, schaug mi nur u
und hod a Frog, iwa de i mi nua wundan ku:
"Woaßt. wia ma a schiache Lawin beschreib?"
I ontwort, wei ma jo nix onas iwableib:
"Do kimmb da Schnee, die Bam, owa a die Stoa -
verschont gor nix, nimmb d'Heisa mid, wia i hoid moa,
die Druckwoin vanicht ois, wos in da Schneisen steht
und nimmb a d'Leid mid, wenn's recht bled hergeht!"
"Richtig! Genau so is!" Des wor jo nid schwar!
Woaßt a, wos a scheene Lawine waar?"
Bein Sepp sein Schmäh häd i's wissen miassen,
"Na! sog?" I woas, i wea die Frog glei biassen:
"A Log Schnee, a Log Weaner, a Log Schnee, a Log Weana"
so gehts no a Bois weida, I wea vor lauta Schaama oiwei kleana!
I find mei Freind da Sepp is do eindeutig z'weit gonga!
I trauat ma des nid, siest kunnt i womigla no a Watschen ei'fonga!

Für die Barbara Karlich-Show am 22.5.2017

21