Page 25 - 2017

Die Höö

"Geh Seppi, schäut decht s'Programm endlich um,
des "Dschungelcamp" im RTL des is so dumm!
Im Zwora bringan's an Gablier,
des is Voiksmusik, des find i schee!"

"Oiwei soid's noch Dir geh, i pack des nimma,
mia kimmb vie, des weascht vo Tog zu Tog no schlimma!
Beißzong, jo a Beißzong - des bist Du fie mi!"
So geht die Streiterei zwischen de zwoa dahi:

Iwas Mull-Aussitrogen und s'Schuach ausziang,
vo Woikeispeck und von Hängebusen kriang,
vom Biabauch und wer s'Klo nid putzt,
wer die Klobrühn u'soacht und die Bischd nid nutzt,

das untam Bett da Stab si staut,
iwas Schnorchen und wer in da Nocht schoast laut,
es kimmb kloraweis da Sex zur Sproch
und dass die ewige Migräne is so zoch,

dass sie an Urlaub fohn mecht und er nid,
so geht des hin und her des G'stried!
Do fliagn die Fetzen, do is koa Ochtung mehr,
so konan die zwoa no hin und her!

Sie schreit und lafft rearad aus'n Zimma,
er hoast'st "hysterisch", es weascht oiwei no schlimma,
bis sie sich vor eam mit d'Händ in die Hüften aufbaut
und an Teller an die Wohnzimmerwand hihaut:

"Du bist so ein Arschloch, so ein Spinner,
do häd i an Teifi vor 40 Johr a direkt heirat'n kinna!"
Sarkarstisch sog er: "Do mecht i owa scho wos in die Diskussion eiwerfen:
Dass die im eascht'n Grad vawondte gor nid heirat'n derfen!"

25