Page 27 - 2017

Aufkoiten

Wennst bei oana Geburt noch dem gonzen Plogen,
des Kind streichin derfst und ummatrogen,
is des so friedlich und voia Liab, es kunnt nix Scheenas geben,
is woi oas von die innigsten Erlebnisse im Leben.

Wenn ebba, den'st gean moggst zu dir herkimmb
und die oafach so in die Arme nimmb,
wonn'st g'spiast, wia sei Wärm auf di iwageht
donn moand ma, dass ma in dem Moment auf oana Woikn steht.

Des Gfüh, wennst gean auf die Berg auffi gehst
und donn auf an einsamen Gipfi oben stehst -
mia tuat jeder load, der so was Schees nid kennt,
des midnond erleben, des is a sötna Moment!

Boidst d'Hond vo ebban hebbst, der s'letz Moi d'Augn schliaßt
und dir des Wossa in die Aug'n schiasst,
wonnst des Gfüh host, dass er in Frieden geht
und hoffst, dass dir a amoi ebba zur Seiten steht.

Dia Gedonken kemmand ma bein Wondan,
von Rummlerhof an Koasa entlong noch Grondan,
wia die Sonnenstroihn auf'n Raureif foien
und die Schneekristalle wia Diamanten stroihen.

A jed's Kristall is onascht, wia mia Menschen a!
Wa nid guad, boid des amend nid a so wa!
Die Wöd wohrnemma, a wenk mehr Liab war fei,
miassad'n oi mitnond nur a wenk aufmerksomer sei!

Is ois vagänglich, hebb nid long u,
i woas, dass i dia Kristalle a nid midnemma ku,
dia scheen Büda muast in dei Heaschz aufnemma,
weist woast, des weascht nit so schnoi wiedakemma!

Boid dia s'Leben soiche Momente schenkt,
muasst woch sei - is schnoia vieh ois wia ma denkt!
Tuas in dein Heaschz aufkoitn, loss owa s'Türl offen,
nocha kust wos davu herschschenken - des tat i hoffen.

27