Page 29 - 2017

Guggug

Danaxt bi i an Woid spaziangonga,
do hod da Guggug as Schrein u'fonga.
Ma sog jo, dass s'Goid nid ausgeht, boid a schreit,
i greif z'rugg auf'n Gödbeidl, damit do nix feid.
Eigentlich is a jo a Sauhund, kust'n nid onascht nenna,
wei die Gschicht vo eam weascht jo sicha kenna:
Is zfaui, dass a soim auf sein Nochwuchs schaut,
und seine Oar bei die Nochborn o'leg und o'haut.
Sei foasta Nochwuchs nimmb si ois wos a daglong!
Bis a die Pippei vo seine Ziachötan aussischmeissen u'fong!
Nocha huckt da aloa in, an Schnowi aufgrissen,
mecht oiwei no mehr und ois ohne schlecht's Gwissen.
Mia deaf'n owa nid g'scheit sei - mia mochen's jo gleich,
das ma dia in da dritten Woid aussaugn des is jo nid neich!
A bei ins schamb si koana, dass dia sterben miassen,
und fie insan Reichtum und die Gier vo ins biassen!
A durch insa Schuid weand dia Orma aus'n Nest vadräng,
wos a mit dem vo ins ruinierten Klima zommhäng,
sie miassn fie insan Reichtum buggeln, es is zun Schaama,
a jeda kennt die G'schichten - owa wos konkret damma?
Nur bein Woffen liefan, do send ma fix!
Boids ins um Hüf beddeln, do hear ma nix!
An des denk i, boid i an Guggug schreien hear,
nua gor so froh wea i bei dia Gedanken nid mehr!

29