Page 33 - 2017

Pippei

Im Fernsehen heard ma jeden Tog,
mia geht's so, dass i scho nimma hihean mog,
dass ma die Balkanrouten spean und s'Mittelmeer,
nocha kammad'n vo unt auffa koane Orma her.
Dia Heita z'ruggschicken ins Chaos, des waar g'scheit,
wo's fie d'Frauen und Kinda scho jetz koa Zukunft geit,
dazu a bissei Goid zu die korrupten Spinna,
des weascht decht woi insa G'wissen beruhigen kinna!
A jeda woas, an wos eigentlich feid!
Dass es im Kriag und Chaos koa Zukunft geit!
Noch dem mia a nid bereit send, fie's Klima ebbas z'toan,
hommb's in Afrika nid vüh Chancen wiri moa!
Es is nid fair, dass mia ins vo da Verantwortung drucken
und mid'n voien Bauch vorm Fernseher hucken,
bei die globalen Konferenzen die Kepf zommsteck'n,
dawei auf da Woid a so fü Tausende ormselig varreck'n!
Wennst a Oar mit an Leffi vo außt aufpeckst,
oda mit'n Messer s'Kappei o'schneidn mext,
ku nia Leben dabei aussakemma - nua da Tod -
des is wo's mia oi prowian - des bring nur Not!
Lebn gibbs nur, wenn's Pipei die Schö vo inn aufbricht -
des waar die Idee vo meina G'schicht!
Waar guad, wonn die Goggei bis doscht hi iwaleb'n
und dass ma ean fie den Weg Chancen gebn.

33