Page 14 - 2018

Die Außerirdischen

Mei Schwiegervater hod des Jakobskraut vanicht,
do hu i ma denkt, do moch i a Büdl und a Gedicht.
Sei Enkei hot a Foto gmocht - sie mog'n gean
und kommentiert's: "Da Opa kimmb vo an ondan Stean!"

Wia waar's eppa, boid die Aliens auf Urlaub kammad'n
und si auf insan scheen Planeten a Auszeit nammad'n?
Am Ufong war des ja sicher ois bärig und gonz fei,
Tiroi miassad fie die Aussairdischen paradiesisch sei!

Owa wenns donn a wenk mea wissen vo insara Ean,
wuschtn'z decht a wenk skeptisch wean!
Hommb vielleicht wos vo intelligentem Leben k'heascht
häd'n g'moand, dass des a nett's Ausfliegei weascht!

Weand easchte Zweifi kemma, bei die Haufen foasten Leit,
daweis's auf da onan Seitn so vüh Hunga geit!
Wenn's im Fernsehen Gourmetfuada vie Hund und Kotz bewerben,
obwoih wo onascht tausende vo Kinda am Hunga sterben!

Kapiean, dass die Schihitten, die Sunnhitten, owa a die Russen,
die Ölscheich, die Amis, die Chinesen - oi tands hussen!
Da Mensch ku ohne Kriag scheints gornid leben
und auf insan scheen Planeten amoi an Frieden geben!

Bau'n Atomraketen, obwoi oi genau wissen,
bei ana Explosion homma oi midnond ausg'schissen!
Des gang die Außerirdischen sicher gornid ei,
so deppat kinnand die Menschen decht nid sei!

Boids sechen, wia mia die Umwelt vorsätzlich vasauen
und insare Kinda a gsunde Zukunft damit vabauen,
miassn's woi moana, dass mir komplett deppat san,
das ma des mit insan eigenen Planeten tan.

Sie sachad'n, wia schee mia's auf dera Wöd häd'n,
wenn man nid nur dem Göd nochlaffd'n wia die Bledn,
wia mia ruachen, ois hobn miassn, wo's zun Kaffen geit
und oft mehr toire Uhren dahoam hommb ois Zeit!

I moa die Invasion waar nur vo kuschza Zeit,
gach wieda zommpocken findat'n sie g'scheit,
eichi ins Raumschiff und weida ziagen,
bevor die Außerirdischen a no an Vogl kriang!

14