Page 18 - 2018

Vadeana

Die Lisi mecht wieda amoi zun Beichten geh,
die gonze Sünden losz'wean waa hoid schee,
der Beichtstuih in da Kirch'n is krod frei,
a schnö's Kreizzeichen und scho is bein Pforra drei.

Da Pforra mocht's Giggal auf, es nimm eam d'Luft
vo außt'eicha schmeckt a von an Parfum den Duft:
"Liebes Kind, wie kann ich zu deinem Seelenfrieden beitragen?
Du kannst mir alle Verfehlungen und Sünden sagen!"

Bei die easchten fünf Gebote hoit sie Lisi nid long auf,
beim sechsten g'woscht a, do boat's krod drauf!
Is, wia wonn ma a Schlauch bein Hydranten u'schliaßt,
wia oa Sünd noch da ona aus da Lisi aussaschießt!

Von Nochban, der oi Tog die Hecken schneid
und auf d'Nocht desweg'n mit sein Weiwi streit,
wei d'Lisi nockat im Gotsch'n auf da Liege ligg
und er hoid den Anblick oi Tog so gean sigg!

Vom Pizzaboten, den's fies Wechselgöd in's Zimma nimmb
und der donn a gonze Bois nimma aussakimmb.
Muaß Parkstrof zoihn, des is hoid bled,
wei a mehr wie 90 Minuten in da Kurzparkzone steht.

Vo die Eischreiwa, die si sich soiwa schreib,
damit da Postla möglichst oft bei ihr picken bleib,
wia's die Manda in da Sauna bis zum Kreislaufkollaps reizt,
wei's nid mit ihre frisch raschiaschtn Reize geizt.

An Pforra fong da weiße Kollar u zun drucken,
er woas a siest nimma recht wia hucken,
wischt si an Schwitz o, woas nimma wos a tat
und zweifelt wieder amoi obs gscheit is, des Zölibat!

"Die Kirche kann dir trotzdem vergeben, das ist das scheene!
Bet' fünf Vater-Unser und Gegrüßet-seist-Du-Maria zehne,
geh hin in Frieden, der Herr, er solle dich beschützen,
Besserung von dir zu verlangen, wird wohl nix nützen!"

18