Page 36 - 2018

Hochzeitsfoto

An Hons und an Sepp, de geht’s guad zomm,
wei’s gean amoi an Jaga-Hoangascht homm.
Iwa d’Weiwaleit und vo da Pirsch,
wenns auf’n Hochstand worten auf die Hirsch.

Die Jaga hommb ja ihr gonz eigene Sproch.
De zun Vasteh, des is adiam zoch,
die zwoa geht’s damit owa guad,
sie vazöhn si, wos da onare krod tuat.

Dass da Sepp sein Buam ins Gymnasium tuat,
do leand er g’scheit Latein und des is guad!
Boid amoi Jaga weascht, is des gonz wichtig,
a solide Vorbereitung find da Seppi do richtig.

An Wohnzimmer derfen koane Krickei sei,
an Sepp sei Frau die find des Glump nid fei!
Drum hod er sie an Koia a Kammal herk’richt,
do hod jede Trophäe an da Wond a eigne G’schicht.

Vom Hirsch die G’weih, a Kopf von Bär’n,
schaugg so bes, do kunnt da grausig wean!
Da Auerhuh hod seine Fliegl ausbroat,
die Wüdsau, die auf’s Fressen boat.

Oa Objekt zoag ebbas wos ma eing’schlepp hommb
breit si aus wie s’Himalayakraut – is gonz verdommb!
Zwitschert gean hoiblustig und hod göwe Hoor,
is mit seine bleden Sprich vie die gonze Woid a G’fohr!

A jeda vazöht Gschichtln, nid oi gonz wohr,
dazua a poor Schnapsei – is eh gonz klor,
die Wohrheit zöht donn nimmamehr,
aus dem kloan Manggei weascht schnoi amoi a dicka Bea!

Mitt’n drinn a Foto von Sepp mid seina Frau,
is no schwarz-weiß, ma siecht’s genau,
is scho a Bois her, mit Blumen und mit’n Schleier,
des is a Ondenken an die Hochzeitsfeier.

36