Page 40 - 2017
P. 40
Tischgebet
Da Karl-Gustav woit an Urlaub buachen
und sie auf da Sunnseit ent an Bauern suachen,
mecht Frau und Kinda den Eindruck geben,
wia oafach und glücklich die Bauern bei ins leben.
Die Familie hot jo heifig Goid,
er fliag ois Geschäftsmonn durch die gonze Woid,
koa Wellness-Area, koan 5-Stean-Schmoan!
Da is a bein Huwabauer fündig woan.
Die Zimma send oafoch, owa ois in Hoiz,
des neiche Scheissheisl im easchten Stock da gonze Stoiz,
zun Essen derf'ns in da Stuben hucken,
die Tiar is no gonz nieder, sie miassen si do bucken.
In da Friah heascht ma, wias an Aufstond geit,
wei beim Huwabauern jo des WLAN feit!
A gonze Woch koa Handy - wia soid des geh?
Die Kinda vom Karl-Gustav finden des nid schee!
Sie siad'n a wenk umma, nocha is zun Kiatreiben Zeit,
do g'won's, dass do a Gaudi geit!
Voi Kuascheisse is des Designagwond,
owa a Stroin in die Augn homms oi mitnand!
Kaiserschmarrn, die Oar vo die eigenen Henna,
Schwammal mid Knedl, Bladl mit Kraut - wos gornid kenna,
an Schweinsbroden mit Krusten und Sauakraut dazu,
es schmeckt ois so guad, sie kriang gornid gnua!
An letzten Obend soid's wos Bsunas sei.
Sie loden an Sepp und d'Lisi zu an 5-Sterne-Koch ei.
Oi zwoa aufg'schwanzt im Feischtoggwond,
des passt, sie send gonz rantig beianond.
Mei geht's do nowi zua, da Tisch so schee,
di zwoa traun si gornid recht zuichi z'geh!
Den Haufen Glasl, Leffi, Gowin und Messer,
die Augen vo die zwoa weand oiwei gresser!
Da Karl-Gustav bstöht fie oi, ma gwoschtz des kunna,
fie die zwoa klingt des owa ois a wenk bsuna,
bein Wei weascht iwan Abgang diskutiascht,
wos zu ana angeregten Diskussion mit'n Köhna fiascht.
40
