Page 46 - 2017

Nix waa's

I woit amoi mein Lebenslauf a wenk vagleichen
und an onan Onsatz finten - an gonz an neichen!
I denk ma, die Laus zum Vagleichen is nid bled,
wei de kenn jeda und woas um wos geht.

Sie leb ois "Nymphe" nid gonz vierzehn Tog,
nocha is gschlechtsreif, des is stressig wonn i das sog!
Nix waa's mid'n Kindsei und bled sei in da Pubertät,
do muast die g'schlein mid'n Dawoxen wean, damit des geht!

S'Weiwi muas oi Tog zehn Oar legen - oi brav befrucht,
boidst do des Mandl waascht, hüfft nur die Flucht!
Nix waa's do mid Urlaub fohn oder wondan geh,
waa'st nur fien Sex do - des waar nid schee!

Häd'st koa dawei, die richtige Frau zun finden,
es zoiat sie nid aus, sie fieh's Leben z'binden.
Nix waa's mid oana netten Frau zommz'leben
und gegenseitig so vüh Liab zun geben.

Bei dem Haufen Kinda gaab's nid amoi an Nom,
wissat'n nid amoi, wia vüh ma homm!
Nix waa's die Kinda unendlich vüh Liebe z'geben
und zruggkriagn - des is woi des Schenste in mein Leben!

Wos die vühn kloan Leis tant, ku koan interessian,
Haupsoch, dass wieda Oar legn und den Kreislauf weidafian.
Nix waa's mid'n Stoiz sei, wonn die Kinda ean Weg mochen,
ea Leben u'nemmand und vüh lochen!

Die Laus leb in die Hoor und jeden graust,
do kunnst das spoor'n, dass da a Heisl baust.
Nix waa's mid an Haus und an Teich zun Schwimma,
dawei füh i mi do so woi - vazichtat darauf nimma!

Bein Selfi-Mochen stecken's zomm die Kepf,
do kunnt'st ois Laus ummikriachen iwa die Zepf,
des waar die oanzig Gaudi, kammad mia in Sinn,
wei i hoid a wenk boshoft und a wenk hintafotzig bin.

So kunnt i no a gonz Boisei fantasian,
nochdenken, vagleichen, tat owa oiwei dazua fian:
Zu mein 70ga denk i ma, so wias is haut des scho hi,
es is scho guad, dass i koa Kopflaus woon bi!

46